ചെന്നൈ : ചെന്നൈയില്‍ രാത്രി മദ്യപിച്ച് നടുറോഡില്‍ അഴിഞ്ഞാടിയ യുവതികളുടെ കൂട്ടത്തില്‍ ഒരാള്‍ കെട്ടിടത്തില്‍നിന്നും താഴേക്കു ചാടി. കഴിഞ്ഞ ദിവസം മദ്യലഹരിയില്‍ റോഡില്‍ വാഹനങ്ങള്‍ തടഞ്ഞ യുവതികളുടെ വിഡിയോ സമൂഹമാധ്യമങ്ങളില്‍ പ്രചരിച്ചിരുന്നു. അന്ന് പൊലീസ് സ്ഥലത്തെത്തി വളരെ ശ്രമകരമായാണ് ഇവരെ കീഴ്‌പ്പെടുത്തി വീട്ടിലെത്തിച്ചത്. ഇവര്‍ക്കെതിരെ പൊതുസ്ഥലത്ത് മദ്യപിച്ച് ബഹളം വച്ചതിനും ഗതാഗതം തടസപ്പെടുത്തിയതിനും കേസ് റജിസ്റ്റര്‍ ചെയ്തു.
ഇതിനിടെ കൂട്ടത്തിലെ സൊനാലി എന്ന യുവതി വീണ്ടും മദ്യപിച്ച ശേഷം നാലാം നിലയില്‍നിന്ന് താഴേക്കു ചാടി.തുടര്‍ച്ചയായ പരാതികളെ തുടര്‍ന്നാണ് കഴിഞ്ഞ ദിവസം പൊലീസ് സംഘം ചെന്നൈ ബാലാജി റോഡിലെ സംഭവസ്ഥലത്ത് എത്തിയത്. ആറു യുവതികള്‍ പരിസരം മറന്ന് തമ്മില്‍ത്തല്ലുന്നതാണ് വനിതാ എസ്‌ഐയും സംഘവും കണ്ടത്.
കൂടാതെ, റോഡിലിറങ്ങി ഗതാഗത തടസവുമുണ്ടാക്കി. കണ്ണകി നഗര്‍ സ്വദേശികളായ ആറു യുവതികള്‍ കേറ്ററിങ് ജോലി ചെയ്യുന്നവരാണ്. കഴിഞ്ഞ ദിവസം ജോലിക്കു ശേഷം ബാറിലെത്തി മദ്യപിച്ചു. മദ്യലഹരിയില്‍ മദ്യക്കുപ്പികളുമായി നടുറോഡിലേക്കിറങ്ങി. ഇതിനിടെയാണ് ആ ദിവസത്തെ ശമ്പളം പങ്കുവയ്ക്കുന്നതുമായി ബന്ധപ്പെട്ട് ഇവര്‍ക്കിടയില്‍ തര്‍ക്കം ഉണ്ടായത്. വാക്‌പോരും തര്‍ക്കവും പിന്നീട് കയ്യാങ്കളിയിലേക്ക് വഴിമാറി.
സ്ഥലത്തുണ്ടായിരുന്ന ചിലര്‍ പ്രശ്‌നത്തില്‍ ഇടപെടാന്‍ ശ്രമിച്ചെങ്കിലും അസഭ്യവര്‍ഷമായിരുന്നു യുവതികളുടെ മറുപടി. ഒടുവില്‍ സഹിക്കെട്ടാണ് നാട്ടുകാര്‍ പൊലീസിനെ വിളിച്ചത്. പൊലീസിനെ കണ്ടതോടെ കൂട്ടത്തിലുണ്ടായിരുന്ന മൂന്നു യുവതികള്‍ ഓടി രക്ഷപ്പെട്ടു. ബാക്കി മൂന്നുപേരും പരിസരം മറന്ന് തമ്മില്‍ത്തല്ലി.
പിന്നാലെ വീണ്ടും റോഡിലിറങ്ങി. ഇതിനിടെ യുവതികളില്‍ ഒരാള്‍ ബസിനു മുന്നിലേക്ക് എടുത്തുചാടി മറ്റൊരാള്‍ അതിലെ വന്ന് ഹോണ്‍ മുഴക്കിയ ലോറിയുടെ മുന്നില്‍ തൂങ്ങിയാടി. വനിതാ പൊലീസ് ഉദ്യോഗസ്ഥര്‍ എത്ര ശ്രമിച്ചിട്ടും കീഴ്‌പ്പെടുത്താന്‍ കഴിയാതെ വന്നതോടെ ഒപ്പമുണ്ടായിരുന്ന പുരുഷ പൊലീസ് ഉദ്യോഗസ്ഥന്‍ ഇടപെട്ടു. സ്ത്രീകളെ അപമാനിക്കുന്നുവെന്ന് പറഞ്ഞ് യുവതികള്‍ അസഭ്യവര്‍ഷം നടത്തിയതോടെ ഈ ഉദ്യോഗസ്ഥന്‍ പിന്‍മാറി.
പിന്നീട് വനിതാ ഉദ്യോഗസ്ഥര്‍ തന്നെ കഷ്ടപ്പെട്ട് മൂന്നു പേരെയും കീഴ്‌പ്പെടുത്തുകയായിരുന്നു. തുടര്‍ന്ന് ആശുപത്രിയിലെത്തിച്ച് വൈദ്യപരിശോധന നടത്തിയശേഷം യുവതികളെ അവരുടെ വീടുകളിലെത്തിച്ചു. പൊതുസ്ഥലത്ത് മദ്യപിച്ച് ബഹളമുണ്ടാക്കിയതിനും ഗതാഗതം തടസപ്പെടുത്തിയതിനും ആറു പേര്‍ക്കുമെതിരെ കേസ് റജിസ്റ്റര്‍ ചെയ്തു.ഇതിനിടെയാണ് കൂട്ടത്തിലുണ്ടായിരുന്ന സൊനാലി എന്ന യുവതി വീണ്ടും മദ്യപിച്ച് കെട്ടിടത്തിന്റെ നാലാം നിലയില്‍നിന്ന് ചാടിയത്.
മദ്യപിച്ചശേഷം പുരുഷ സുഹൃത്തുമായി കഴിഞ്ഞ ദിവസം റോഡില്‍ സംഭവിച്ച കാര്യങ്ങളെക്കുറിച്ച് വഴക്കുണ്ടായതായി പറയുന്നു. തുടര്‍ന്നാണ് നാലാം നിലയില്‍നിന്ന് ചാടിയത്. ഗുരുതരമായി പരുക്കേറ്റ യുവതി ഇപ്പോള്‍ ചികിത്സയിലാണ്.
Discussion about this post