തിരുവനന്തപുരം: സുഹൃത്തായ യുവതി നല്‍കിയ ജ്യൂസ് കുടിച്ച് യുവാവ് മരിച്ചു. പാറശ്ശാല മുര്യങ്കര ജെ പി ഹൗസില്‍ ജയരാജിന്റെ മകന്‍ ഷാരോണ്‍ രാജ് (ജിയോ- 23) ആണ് മരിച്ചത്. സംഭവത്തില്‍ ദുരൂഹതയുണ്ടെന്നാണ് ബന്ധുക്കളുടെ ആരോപണം.
ഈ മാസം 14നാണ് ഷാരോണ്‍ രാജും സുഹൃത്ത് റെജിനും ചേര്‍ന്ന് രാമവര്‍മ്മന്‍ ചിറയില്‍ താമസിക്കുന്ന പെണ്‍കുട്ടിയുടെ വീട്ടില്‍ എത്തിയത്. റെക്കോര്‍ഡ് വാങ്ങാനാണ് ഷാരോണ്‍ പെണ്‍കുട്ടിയുടെ വീട്ടില്‍ പോയതെന്ന് വീട്ടുകാര്‍ പറയുന്നു. സുഹൃത്ത് റെജിനെ പുറത്ത് നിറുത്തി ഷാരോണ്‍ തനിച്ച് വീടിനുള്ളിലേക്ക് പോയി. കുറച്ച് കഴിഞ്ഞ് പുറത്തേയ്ക്ക് വന്ന ഷാരോണ്‍ പെണ്‍കുട്ടി ഒരു പാനീയം നല്‍കിയെന്നും അത് കഴിച്ചയുടന്‍ ഛര്‍ദ്ദില്‍ അനുഭവപ്പെട്ടുവെന്നും റെജിനോട് പറഞ്ഞു. തുടര്‍ന്ന് അവശനിലയിലായതോടെ തന്നെ വീട്ടില്‍ എത്തിക്കാനും റെജിനോട് ആവശ്യപ്പെട്ടു.
ഉച്ചയ്ക്ക് ശേഷം വീട്ടിലെത്തിയ ഷാരോണിന്റെ അമ്മ കാണുന്നത് ഛര്‍ദിച്ച് അവശനിലയില്‍ കിടക്കുന്ന മകനെയായിരുന്നു. ഉടന്‍തന്നെ ഷാരോണിനെ പാറശാല താലൂക്ക് ആശുപത്രിയില്‍ എത്തിക്കുകയും അവിടെ നിന്ന് മെഡിക്കല്‍ കോളേജിലേക്ക് അയക്കുകയും ചെയ്തു. മെഡിക്കല്‍ കോളേജ് ആശുപത്രിയില്‍ നടത്തിയ പരിശോധനകളില്‍ കാര്യമായ പ്രശ്‌നങ്ങള്‍ കണ്ടെത്താത്തതിനെ തുടര്‍ന്ന് രാത്രിയോടെ വീട്ടിലേക്ക് തിരിച്ചയച്ചു.
എന്നാല്‍ തൊട്ടടുത്ത ദിവസം വായ്ക്കുള്ളില്‍ വ്രണങ്ങള്‍ ഉണ്ടാവുകയും വെള്ളം പോലും കുടിക്കാന്‍ കഴിയാത്ത സ്ഥിതിയിലാവുകയും ചെയ്തു. പിന്നീട് മരുന്ന് പോലും കഴിക്കാന്‍ കഴിയാത്ത അവസ്ഥയിലായി. ശേഷം 17ന് വീണ്ടും മെഡിക്കല്‍ കോളജ് ആശുപത്രിയില്‍ നടത്തിയ പരിശോധനകളില്‍ വൃക്കകളുടെ പ്രവര്‍ത്തനം കുറയുന്നതായി കണ്ടെത്തി. അടുത്ത ദിവസങ്ങളില്‍ പല ആന്തരികാവയവങ്ങളുടെയും പ്രവര്‍ത്തനം മോശമായി തുടങ്ങി. ഒന്‍പത് ദിവസത്തിനുള്ളില്‍ മൂന്ന് തവണ ഷാരോണിനെ ഡയാലിസിസിന് വിധേയമാക്കുകയും നില മോശമായതിനെ തുടര്‍ന്ന് വെന്റിലേറ്ററിലേക്ക് മാറ്റുകയും ചെയ്തു.
ഒരു വര്‍ഷമായി പരിചയമുള്ള പെണ്‍കുട്ടിയുടെ വീട്ടില്‍ നിന്ന് കഷായവും ജ്യൂസും കുടിച്ചതായി യുവാവ് ബന്ധുക്കളെ അറിയിച്ചിരുന്നു. ആസിഡ് പോലുള്ള എന്തോ അകത്ത് ചെന്നതായി ഡോക്ടര്‍മാര്‍ സ്ഥിരീകരിച്ചു. ആന്തരീകാവയവങ്ങള്‍ ദ്രവിച്ച് പോയതായും വെന്റിലേറ്ററിലിരിക്കെ 25ന് ഹൃദയാഘാതം സംഭവിച്ചായിരുന്നു മരണമെന്നും ഡോക്ടര്‍മാര്‍ പറഞ്ഞു.
സംഭവത്തില്‍ അന്വേഷണം ആവശ്യപ്പെട്ട് പിതാവ് പാറശാല പൊലീസിന് പരാതി നല്‍കി. മരിച്ച ഷാരോണ്‍ രാജ് നെയ്യൂര്‍ ക്രിസ്ത്യന്‍ കോളേജിലെ അവസാന വര്‍ഷ ബിഎസ്സി റോഡിയോളജി വിദ്യാര്‍ത്ഥിയാണ്.
https://youtu.be/mHcS1XUbwrU
Discussion about this post