തിരുവനന്തപുരത്തും വയനാട്ടിലും സിപിഐഎം ജില്ലാ സെക്രട്ടറിയേറ്റ് രൂപീകരിച്ചു. അഞ്ച് പുതുമുഖങ്ങളെ ഉൾപ്പെടുത്തിയാണ് തിരുവനന്തപുരം ജില്ലാ സെക്രട്ടറിയേറ്റ് രൂപീകരിച്ചത്. എംഎൽഎമാരായ സി കെ ഹരീന്ദ്രൻ, ഐബി സതീഷ് എന്നിവർ സെക്രട്ടറിയേറ്റിൽ ഉൾപ്പെട്ടു. സി ലെനിൻ, ബി സത്യൻ, പി എസ് ഹരികുമാർ എന്നിവരാണ് മറ്റു പുതുമുഖങ്ങൾ.
ജയൻ ബാബു സെക്രട്ടറിയേറ്റിൽ നിന്നും ഒഴിവാകുകയും ചെയ്തു. ഞായറാഴ്ച ജില്ലാ കമ്മിറ്റി ചേർന്നാണ് പുതിയ സെക്രട്ടേറിയറ്റിനെ തിരഞ്ഞെടുത്തത്. 12 പേരാണ് സെക്രട്ടേറിയറ്റിലുള്ളത്. ജില്ലാ സെക്രട്ടറി അഡ്വ. വി ജോയ്, സി അജയകുമാർ, എൻ രതീന്ദ്രൻ, ബി പി മുരളി, ആർ രാമു, കെ എസ് സുനിൽകുമാർ, എസ് പുഷ്പലത എന്നിവരാണ് മറ്റു സെക്രട്ടറിയേറ്റ് അംഗങ്ങൾ.
അതേസമയം തിങ്കളാഴ്ച ചേർന്ന വയനാട് ജില്ലാ കമ്മിറ്റിയാണ് പുതിയ എട്ടംഗ ജില്ലാ സെക്രട്ടറിയേറ്റിനെ തിരഞ്ഞെടുത്തത്. സംസ്ഥാന കമ്മിറ്റിയിൽ നിന്നും ഒഴിവാക്കിയ മുൻ ജില്ലാ സെക്രട്ടറി പി ഗഗാറിനെ ജില്ലാ സെക്രട്ടറിയേറ്റിൽ ഉൾപ്പെടുത്തി. കോട്ടത്തറ ഏരിയ സെക്രട്ടറി എം മധു, രുഗ്മിണി നുബ്രമണ്യൻ എന്നിവരാണ് സെക്രട്ടറിയേറ്റിലെ പുതുമുഖങ്ങൾ. വി ഉഷാകുമാരി, മന്ത്രി ഒ ആർ കേളു എന്നിവർ ഒഴിവായി.കെ റഫീഖ്, എ എൻ പ്രഭാകരൻ, വി വി ബേബി, പി കെ സുരേഷ്, പി വി സഹദേവൻ എന്നിവരാണ് മറ്റുഅംഗങ്ങൾ.