രുചികരമായ തക്കാളി സോസ് വീട്ടിലുണ്ടാക്കാം

തക്കാളി സോസ് എല്ലാവർക്കും ഏറെ പ്രിയപ്പെട്ട ഒരു വിഭവമാണ്. എന്നാൽ പുറത്ത് നിന്നും എപ്പോഴും അത് വാങ്ങിയുപയോഗിക്കുന്നത് അത്ര ആരോഗ്യപ്രദമല്ലതാനും. വീട്ടിൽ തന്നെ എളുപ്പത്തിൽ ആരോഗ്യപ്രദമായ രീതിയിൽ തക്കാളി സോസ് എങ്ങനെ ഉണ്ടാക്കാം എന്ന് നോക്കാം.

വേണ്ട സാധങ്ങൾ

തക്കാളി -1 കിലോ
വിനാഗിരി -1/3 കപ്പ്
പഞ്ചസാര -1/2 കപ്പ്
പച്ചമുളക് -4
ഏലക്കാ -4
ഗ്രാമ്പൂ-5
കറുവപട്ട -1 മീഡിയം കഷണം
പെരുംജീരകം -1/2 റ്റീസ്പൂൺ
ജീരകം -1/2 റ്റീസ്പൂൺ
ഇഞ്ചി വെള്ളുതുള്ളി പേസ്റ്റ് -1.5 റ്റീസ്പൂൺ
സവാള -1
ഉപ്പ് ആവശ്യത്തിന്

പാചകം ചെയ്യുന്ന വിധം

പാത്രത്തിൽ ആവശ്യത്തിനു വെള്ളം ഒഴിച്ച് കഴുകി വൃത്തിയാക്കിയ തക്കാളി കൂടെ ഇട്ട് തിളപ്പിക്കണം. ശേഷം വെള്ളം നന്നായി തിളച്ച് തക്കാളിയുടെ തൊലി അടർന്നു വരുന്ന പരുവം ആകുമ്പോൾ തീ ഓഫ് ചെയ്യാം. ശേഷം തക്കാളി നല്ല തണുത്ത വെള്ളതിൽ ഇട്ടുവെക്കുക. ചൂട് നന്നായി പോയതിന് ശേഷം എല്ലാ തക്കാളിയും തൊലി കളഞ്ഞെടുക്കണം. മിക്‌സിയിലിട്ട് നല്ലവണ്ണം പേസ്റ്റ് ആക്കിയെടുക്കാം.

ഗ്രാമ്പൂ, കറുകപട്ട, പച്ചമുളക്, സവാള, ഏലക്ക, പെരുംജീരകം, ജീരകം ഇവ ചെറുതായി ചതച്ച്, ഇഞ്ചി വെള്ളുതുള്ളി പേസ്റ്റും കൂടെ ചേർത്ത് ഒരു വൃത്തിയുള്ള തുണിയിൽ കിഴി കെട്ടി എടുക്കുക.അടികട്ടിയുള്ള ഒരു പാൻ അടുപ്പിൽ വച്ച് ശേഷം തക്കാളി പേസ്റ്റ് ഒഴിച്ച് ഇളക്കണം. തുടർന്ന് ഉണ്ടാക്കി വെച്ചിരിക്കുന്ന കിഴി കൂടി അതിൽ ഇട്ട് ഇളക്കി ചൂടാക്കാം. നന്നായി ചൂടായി കുറുകാൻ തുടങ്ങുമ്പോൾ വിനാഗിരി പഞ്ചസാര ഉപ്പ് ഇവ കൂടെ ചേർത്ത് നന്നായി തിളച്ചശേഷം കുറുകി വരുന്നത് വരെ ഇളക്കിക്കൊടുക്കുക. ശേഷം കിഴിയെടുത്ത് തക്കാളി ചാറിലേക്ക് നന്നായി പിഴിഞ്ഞ് ആ സത്ത് മുഴുവൻ ഇറങ്ങാൻ അനുവദിക്കുക. ആ സമയം നന്നാായി ഇളക്കി കൊടുക്കണം. 25 മിനിറ്റിനു ശേഷം തീ അണക്കാം. തണുത്ത ശേഷം കുപ്പിയിലാക്കി സൂക്ഷിക്കുക.