അന്താരാഷ്ട്ര ക്രിക്കറ്റ് താരങ്ങളിൽ ഏറ്റവും കൂടുതല്‍ ആസ്തിയുള്ള താരമാണ് എന്ന് ചോദിച്ചാൽ ഇനി ഉത്തരം മുന്‍ ഇന്ത്യന്‍ ക്യാപ്റ്റന്‍ വിരാട് കോലി എന്നാണ്. സ്‌റ്റോക് ഗ്രോയുടെ റിപ്പോര്‍ട്ട് പ്രകാരം 1050 കോടിയാണ് കോലിയുടെ നിലവിലെ ആസ്തി. നിലവില്‍ ഏറ്റവും കൂടുതല്‍ സോഷ്യല്‍ മീഡിയ പിന്തുണയുള്ള ലോക കായിക താരങ്ങളില്‍ ഒരാളാണ് കോലി.
252 ദശലക്ഷം ഇന്‍സ്റ്റഗ്രാം ഫോളോവേഴ്‌സുണ്ട് കോലിക്ക്. ബിസിസിഐയുടെ എ+ കോണ്‍ട്രാക്റ്റ് പ്രകാരം ഏഴ് കോടിയാണ് കോലിക്ക് വര്‍ഷത്തില്‍ ലഭിക്കുന്നത്. മാത്രമല്ല, ടെസ്റ്റ് മാച്ച് ഫീയായി 15 ലക്ഷവും ഏകദിനത്തില്‍ ആറ് കോടിയും ടി20യില്‍ മൂന്ന് കോടിയും ലഭിക്കും. 15 കോടി ഐപിഎല്ലിൽ നിന്നും ലഭിക്കുന്നുണ്ട്.
വിവിധ ബ്രാന്‍ഡുകളില്‍ നിക്ഷേപമുള്ള കോലി പരസ്യങ്ങളില്‍ അഭിനയിക്കുന്നതിന് 7.50 കോടി മുതല്‍ 10 കോടിവരെയാണ് വാങ്ങുന്നത്. ഇന്‍സ്റ്റഗ്രാമിലെ ഒരു പോസ്റ്റിന് 8.9 കോടിയും ട്വീറ്റിന് 2.5 കോടിയും ലഭിക്കും. ഇതുകൂടാതെ മുംബൈയില്‍ 34 കോടിയുടെ വീട്. ഗുരുഗ്രാമില്‍ 80 കോടിയുടെ വീടും സ്വന്തമായുണ്ട്. 31 കോടിയോളം വിലവരുന്ന കാറുകളും കോലിക്കുണ്ടെന്ന് റിപ്പോര്‍ട്ടില്‍ പറയുന്നു. ഇന്ത്യന്‍ സൂപ്പര്‍ ലീഗ് ക്ലബായ എഫ്‌സി ഗോവയുടെ ഉടമസ്ഥതയിലും വിരാട് കോലി പങ്കാളിയാണ്. ടെന്നിസ് ടീമും പ്രൊഫഷണല്‍ റെസ്ലിംഗ് ടീമിനും കോലിക്ക് നിക്ഷേപമുണ്ട്.
ഇനി വെസ്റ്റ് ഇന്‍ഡീസിനെതിരെയാണ് കോലി കളിക്കുക. ടെസ്റ്റ് ടീമില്‍ കോലി കളിക്കുമെന്നാണ് ഇപ്പോൾ പുറത്തുവരുന്ന റിപ്പോര്‍ട്ട്.
Summary: Virat Kohli’s assets are beyond 1000 crores.