ന്യൂഡല്‍ഹി: അപകീര്‍ത്തി കേസില്‍ രാഹുല്‍ ഗാന്ധിയുടെ അപ്പീല്‍ തള്ളിയ സൂറത്ത് സെഷന്‍സ് കോടതി വിധിക്കെതിരെ ഹൈക്കോടതിയെ സമീപിക്കുമെന്ന് എഐസിസി ജനറല്‍ സെക്രട്ടറി കെ സി വേണുഗോപാല്‍. കേസില്‍ നിയമപോരാട്ടം തുടരും. നിയമവശങ്ങള്‍ ആലോചിച്ച് മുന്നോട്ടുപോകാനാണ് തീരുമാനമെന്നും കെ സി വേണുഗോപാല്‍ പറഞ്ഞു.വര്‍ത്തമാന കാല സാഹചര്യം എല്ലാവര്‍ക്കും അറിയാവുന്നതാണ്.
ഗുജറാത്തിലെ കോടതിയില്‍ നിന്നും നീതി പ്രതീക്ഷിച്ച് കോണ്‍ഗ്രസ് മുന്നോട്ടുപോയതാണ്. ഈ കേസിന്റെ മെറിറ്റ് എന്താണെന്ന് എല്ലാവര്‍ക്കും അറിയാം. കോണ്‍ഗ്രസിന്റെ വാദങ്ങളും പൊതു സമൂഹത്തിന് മുന്നിലുണ്ട്. എന്തായാലും നീതിപീഠത്തിന്മേലുള്ള വിശ്വാസം പൂര്‍ണമായും അവസാനിപ്പിച്ചിട്ടില്ല. അര്‍ഹമായ നീതി കിട്ടിയിട്ടില്ല എന്നതാണ് സെഷന്‍സ് കോടതി വിധി വ്യക്തമാക്കുന്നത്.
ഇതുകൊണ്ടൊന്നും ഭയപ്പെടുന്ന ആളല്ല രാഹുല്‍ഗാന്ധി. ശിക്ഷിച്ചാലും ജയിലില്‍ അടച്ചാലും പറയാനുള്ള കാര്യം പറയുമെന്ന് രാഹുല്‍ വ്യക്തമാക്കിയിട്ടുള്ളതാണെന്നും കെ സി വേണുഗോപാല്‍ പ്രതികരിച്ചു. അപകീര്‍ത്തി പരാമര്‍ശത്തില്‍ കുറ്റക്കാരനെന്നു കണ്ടെത്തി ശിക്ഷിച്ച സൂറത്ത് സിജെഎം കോടതി വിധിക്കെതിരെ രാഹുല്‍ ഗാന്ധി നല്‍കിയ അപ്പീലാണ് സൂറത്ത് സെഷന്‍സ് കോടതി തള്ളിയത്.
രാഹുല്‍ കുറ്റക്കാരനാണെന്ന വിധി സെഷന്‍സ് കോടതി സ്റ്റ ചെയ്തില്ല. വിധി സ്റ്റേ ചെയ്യാത്ത സാഹചര്യത്തില്‍ എംപി സ്ഥാനത്തിന് രാഹുലിനുള്ള അയോഗ്യത തുടരും.