തിരുവനന്തപുരം: സംസ്ഥാനത്ത് എസ് എസ് എല്‍ സി പരീക്ഷകള്‍ക്ക് നാളെ തുടക്കം. 4,19,362 വിദ്യാര്‍ത്ഥികളാണ് പരീക്ഷയെഴുതുന്നത്. ഇത്തവത്തെ പരീക്ഷയിലെ ചോദ്യങ്ങള്‍ പൂര്‍ണ്ണമായും പാഠഭാഗങ്ങളില്‍ നിന്നുള്ളതാണ്. കടുത്ത ചൂടുള്ള കാലാവസ്ഥ ആയതിനാല്‍ പരീക്ഷകള്‍ രാവിലെ 9.30 മുതലാണ് ആരംഭിക്കുന്നത്. 2021 ലും 22 ലും കോവിഡ് ഭീതിക്കിടെയായിരുന്നു എസ്എസ്എല്‍സി പരീക്ഷ. കൃത്യമായി ക്ലാസുകള്‍ ലഭിക്കാത്തതിനാല്‍ പാഠഭാഗങ്ങള്‍ തീര്‍ക്കാന്‍ അദ്ധ്യാപകര്‍ക്കും കഴിഞ്ഞില്ല. അതുകൊണ്ട് ഫോക്കസ് ഏരിയ വെച്ചായിരുന്നു അന്നത്തെ പരീക്ഷ. അതായത് ചോയ്‌സ് അടിസ്ഥാനത്തിലായിരുന്നു ചോദ്യങ്ങള്‍.
എന്നാല്‍ ഇപ്രാവശ്യം അത് മാറി പഴയപോലെ പാഠഭാഗങ്ങള്‍ മുഴുവനും അടിസ്ഥാനമാക്കിയാകും ചോദ്യങ്ങള്‍. 29 വരെയാണ് എസ്എസ്എല്‍സി പരീക്ഷ. എസ് എസ്എല്‍സി പരീക്ഷ എഴുതുന്നതില്‍ 57.20 ശതമാനവും ഇംഗ്‌ളീഷ് മീഡിയം വിദ്യാര്‍ത്ഥികളാണ്.ഏപ്രില്‍ 3 മുതല്‍ എസ്എസ്എല്‍സി മൂല്യനിര്‍ണ്ണയം തുടങ്ങും. മെയ് രണ്ടാം വാരം എസ്എസ്എല്‍സി ഫലവും പ്രഖ്യാപിക്കും.
അതെ സമയം ഹയര്‍സെക്കണ്ടറി പരീക്ഷകള്‍ വെള്ളിയാഴ്ച്ച തുടങ്ങും.30ന് പരീക്ഷകള്‍ തീരും. എസ്എസ്എല്‍സി പ്ലസ്ടു പരീക്ഷകള്‍ക്കിടെ ഒന്ന് മുതല്‍ 9 വരെയുള്ള ക്ലാസുകളിലെ പരീക്ഷകള്‍ കൂടി ഇത്തവണ വരുന്നുണ്ട്. 13 മുതലാണ് ഈ പരീക്ഷകള്‍ തുടങ്ങുന്നത്. അതും ഉച്ചക്ക് 1.30 മുതല്‍. എല്ലാ പരീക്ഷകളും ഒരുമിച്ച് വരുന്നത് കാരണം ഡ്യൂട്ടി സംവിധാനത്തില്‍ ആശങ്കയുള്ളതായി അധ്യാപകര്‍.
Discussion about this post