പാലക്കാട്: മണ്ണാര്‍ക്കാട് കോട്ടേപ്പാടത്ത് കോഴിക്കൂട്ടില്‍ കുടുങ്ങിയ പുലി ചത്തു.ഇന്ന് പുലര്‍ച്ചെ 2 മണിയോടെ കുടുങ്ങിയ പുലി 5 മണിക്കൂറുകള്‍ക്ക് ശേഷമാണ് ചത്തത്. മരണകാരണം കണ്ടെത്താന്‍ മണ്ണാര്‍ക്കാട് ഫോറസ്റ്റ് സ്റ്റേഷനില്‍ എത്തിച്ച് പോസ്റ്റ്‌മോര്‍ട്ടം നടത്തും.ഇതിന് വേണ്ടി വനംവകുപ്പ് ഉദ്യോഗസ്ഥര്‍ പുലിയെ മണ്ണാര്‍ക്കാട്ടേക്ക് കൊണ്ടുപോയി.
കുന്തിപ്പാടം പൂവത്താണി സ്വദേശി ഫിലിപ്പിന്റെ വീടിനോട് ചേര്‍ന്നുള്ള കോഴിക്കൂട്ടിലാണ് പുലി കുടുങ്ങിയത്. കോഴികളുടെ ബഹളം കേട്ട് പുറത്തിറങ്ങി നോക്കിയപ്പോഴാണ് പുലിയെ കൂട്ടില്‍ കണ്ടത്. പുലി കോഴിക്കൂട് തകര്‍ത്ത് പുറത്തുകടക്കാനുള്ള ശ്രമം നടത്തിയിരുന്നു. ഇതിനിടെ, കൂട്ടിലെ ഇരുമ്പഴിക്കുള്ളില്‍ കുടുങ്ങി പുലിയുടെ ഒരു കാലിന് പരുക്കേറ്റിരുന്നു. പുലിയെ മയക്കുവെടിവച്ച് പിടികൂടാനായിരുന്നു നീക്കം.