കീവ്: യുക്രൈനിലെ നിപ്രയില്‍ പാര്‍പ്പിട സമുച്ചയങ്ങള്‍ക്ക് നേരെ റഷ്യ നടത്തിയ മിസൈല്‍ ആക്രമണത്തില്‍ 12 പേര്‍ കൊല്ലപ്പെട്ടു.64 പേര്‍ക്ക് പരുക്കേറ്റതായും റിപ്പോര്‍ട്ടുകളുണ്ട്. സൊളീദാര്‍ നഗരം പിടിച്ചെന്ന് റഷ്യ അവകാശപ്പെട്ടെങ്കിലും യുക്രൈന്‍ അത് തള്ളിയിരുന്നു. കിഴക്കന്‍ നഗരമായ സൊളീദാര്‍ പിടിക്കാനായി ഏതാനും ദിവസങ്ങളായി നടക്കുന്ന കനത്ത പോരാട്ടത്തിന്റെ ഭാഗമായാണ് പുതിയ ആക്രമണങ്ങളെന്നാണ് സൂചന.
ഖര്‍കീവ്, ബഖ്മുത് നഗരങ്ങള്‍ കീഴടക്കാന്‍ തീവ്രശ്രമം റഷ്യ നടത്തുകയാണെന്നും റിപ്പോര്‍ട്ടുകള്‍ പറയുന്നു.യുക്രൈന്‍ തലസ്ഥാനമായ കീവിലും കിഴക്കന്‍ നഗരമായ ഖര്‍കീവിലും ശനിയാഴ്ച പുലര്‍ച്ചെ റഷ്യ നടത്തിയ മിസൈല്‍ ആക്രമണത്തില്‍ കനത്ത നാശനഷ്ടമുണ്ടായി. വൈദ്യുതി വിതരണം അടക്കമുള്ള അടിസ്ഥാന സൗകര്യങ്ങള്‍ നശിപ്പിക്കാന്‍ ലക്ഷ്യമിട്ടായിരുന്നു ആക്രമണം.ഖര്‍കീവ് നഗരത്തില്‍ രണ്ട് എസ്300 മിസൈലുകളാണ് പതിച്ചതെന്ന് ഗവര്‍ണര്‍ ഒലെഗ് സിനെഹുബോ പറഞ്ഞു.
വൈദ്യുതി വിതരണ ശൃംഖലയെയും വ്യവസായ സ്ഥാപനങ്ങളെയും ആക്രമിച്ചതായും അറിയിച്ചു. കീവില്‍ ജനവാസം കുറഞ്ഞ മേഖലയിലാണ് മിസൈല്‍ പതിച്ചത്. സ്ഥലത്ത് തീപിടിത്തമുണ്ടായെങ്കിലും ആളപായമില്ല.കീവിനു പുറത്തുള്ള കോപ്പിലിവില്‍ ആളൊഴിഞ്ഞുപോയ വീടുകളുള്ള പ്രദേശത്താണ് മിസൈല്‍ പതിച്ചത്.
Discussion about this post