ഹൈദരാബാദ്: തെലങ്കാനയിലെ മഞ്ചര്യാല ജില്ലയില്‍ ശനിയാഴ്ച വീട്ടിലുണ്ടായ തീപിടിത്തത്തില്‍ ഒരു കുടുംബത്തിലെ 6 പേര്‍ വെന്തുമരിച്ചു. വീട്ടുടമ ശിവയ്യ (50), ഭാര്യ പത്മ (45), പത്മയുടെ മൂത്ത സഹോദരിയുടെ മകള്‍ മൗനിക (23), രണ്ട് പെണ്‍മക്കള്‍ എന്നിവരാണ് മരിച്ചത്.
തെലങ്കാനയിലെ മന്ദമാരി മണ്ഡലത്തിലെ വെങ്കടാപൂരിലെ വീട്ടിലാണ് ശിവയ്യയും ഭാര്യ പത്മയും താമസിച്ചിരുന്നതെന്ന് മന്ദമാരി സര്‍ക്കിള്‍ ഇന്‍സ്പെക്ടര്‍ ഓഫ് പോലീസ് പ്രമോദ് കുമാര്‍ പറഞ്ഞു.
രണ്ട് ദിവസങ്ങള്‍ക്ക് മുമ്പ് പത്മയുടെ മരുമകള്‍ മൗനികയും രണ്ട് പെണ്‍മക്കളും ശാന്തയ്യ എന്ന സ്ത്രീയും ഇവരുടെ വീട്ടില്‍ വന്നിരുന്നു. രാത്രി 12:00 നും 12:30 നും ഇടയില്‍ അവരുടെ വീടിന് തീപിടിച്ചതായി അയല്‍വാസികള്‍ ശ്രദ്ധിച്ചുവെന്ന് സി.ഐ പറഞ്ഞു.
അയല്‍വാസികള്‍ ഉടന്‍ തന്നെ നാട്ടുകാരെയും പിന്നീട് പോലീസിനെയും വിവരമറിയിച്ചിരുന്നു. രക്ഷാപ്രവര്‍ത്തകര്‍ എത്തിയപ്പോഴേക്കും വീട് പൂര്‍ണമായും കത്തി നശിച്ചിരുന്നു.
വീട്ടിലുണ്ടായിരുന്ന ആറംഗങ്ങളാണ് മരിച്ചത്. തീപിടിത്തമുണ്ടാകാനുള്ള കാരണം വ്യക്തമല്ല. കൂടുതല്‍ വിശദാംശങ്ങള്‍ അന്വേഷിച്ചുവരികയാണെന്നും പോലീസ് ഉദ്യോഗസ്ഥര്‍ കൂട്ടിച്ചേര്‍ത്തു.