സ്വാതന്ത്ര്യത്തിനായുള്ള പോരാട്ടത്തിന്റെയും വിലക്കപ്പെട്ട പ്രണയത്തിന്റെയും വിശ്വസ്തതയുടെയും വിശ്വസനീയമായ യാഥാര്‍ത്ഥ്യങ്ങളിലൂടെ സംഭവ ബഹുലമായ ചരിത്രത്തിലേയ്ക്കുള്ള തിരിച്ചു നടത്താണ് താന്‍സാനിയന്‍ ചിത്രം ടഗ് ഓഫ് വാര്‍. കൊളോണിയല്‍ കാലഘട്ടത്തിലെ സാന്‍സിബാറാണ് കഥാപരിസരം. ബ്രിട്ടീഷുകാരുടെ ഭിന്നിപ്പിച്ചു ഭരിക്കലിന്റെ ദുരന്തം ഏറ്റു വാങ്ങിയ ജനതയെ സംവിധായകന്‍ അമില്‍ ശിവ്ജി ലോകത്തിനു മുന്നില്‍ അവതരിപ്പിക്കുകയാണ്.
സംസ്‌കാരത്തിന്റെ പേരിലും വംശത്തിന്റെ പേരിലും ജനങ്ങളെ ഭിന്നിപ്പിച്ച് സാമ്രാജ്യത്വം നിലനിര്‍ത്താന്‍ ശ്രമിച്ച ബ്രിട്ടീഷ് ഭരണത്തിനെതിരെ സ്വത്വം നിലനിര്‍ത്താനുള്ള ഒരു ജനതയുടെ പോരാട്ടമാണ് ഇതിവൃത്തം. പ്രതിരോധത്തില്‍ തുടങ്ങി പ്രതിഷേധത്തിലൂടെ വളര്‍ന്ന് വിപ്ലവത്തിന്റെ പാതയിലെത്തി സ്വാതന്ത്ര്യം നേടുന്ന ചരിത്രമാണ് പുനഃസൃഷ്ടിച്ചിരിക്കുന്നത്. യാസ്മിന്‍ എന്ന ശക്തയായ പോരാളിയെ മനോഹരമാക്കി അവതരിപ്പിക്കാന്‍ സംവിധായകനു കഴിഞ്ഞു. ലോലവികാരങ്ങളല്ല അവളെ നയിക്കുന്നത് അടങ്ങാത്ത സ്വാതന്ത്ര്യദാഹമാണ്. അതിനായുള്ള പോരാട്ടങ്ങളാണ് അവളുടെ ലക്ഷ്യം. അതിനായുള്ള ശക്തി തേടലാണ് മുഖ്യം. എങ്കിലും വിലക്കപ്പെട്ട പ്രണയം അവള്‍ക്കുള്ളില്‍ ജ്വലിക്കുന്നുണ്ട്.
ഡെംഗയെന്ന വിപ്ലവകാരിയുടെ ലക്ഷ്യവും മാര്‍ഗവും യാസ്മിന്റേതു തന്നെ. യാസ്മിന്‍ ഡെംഗയെയാണ് പിന്തുടരുന്നത്. പരസ്പരം വിശ്വസ്തരാണ് ഇരുവരും. സ്വാതന്ത്ര്യ ലബ്ധിയാണ് ഇരുവരുടെയും സ്വപ്നം. ഇതിനായുള്ള അവരുടെ പോരാട്ടത്തിനിടയില്‍ പലവിധ സാഹചര്യങ്ങളിലൂടെ കടന്നു പോകുന്ന സിനിമ അന്നത്തെ ഭരണകൂടത്തിന്റെ ക്രൂരമായ അടിച്ചമര്‍ത്തലിന്റെയും ഭീഷണിയുടെയും യാഥാര്‍ത്ഥ്യങ്ങളിലേയ്ക്ക് കടന്നു ചെല്ലുന്നു.
സ്വാതന്ത്ര്യമെന്ന മഹത്വത്തിന്റെ വില മഹത്തരമാണെന്ന് തിരിച്ചറിയണമെങ്കില്‍ അതിനായി നടന്ന പോരാട്ടങ്ങള്‍ ശരിയായ അര്‍ത്ഥത്തില്‍ മനസിലാക്കണം. അതിനായി ഹോമിക്കപ്പെട്ടവരുടെ ജീവിതം പഠിക്കണം. ത്യാഗത്തിന്റെ വ്യാപ്തിയും ബോദ്ധ്യപ്പെടുത്തണം. ടഗ് ഓഫ് വാര്‍ അതൊക്കെ വിശദമായി തന്നെ വ്യക്തമാക്കുന്നു. ഛായാഗ്രഹണത്തിന്റെ മികവും സീനുകളുടെ ക്രമീകരണവും സംഘര്‍ഷാത്മകത നിലനിര്‍ത്തുന്ന സംഗീതവും സിനിമയെ മികച്ച നിലവാരത്തിലേയ്ക്ക് ഉയര്‍ത്തുന്നു. കേരള രാജ്യാന്തര ചലച്ചിത്ര മേള കണ്ട പോരാട്ടത്തിന്റെ മികച്ച ചിത്രങ്ങളിലൊന്നാണ് ടഗ് ഓഫ് വാര്‍.
നാളെ കൈരളിയില്‍ വൈകിട്ട് മൂന്നിന് ടഗ് ഓഫ് വാറിന്റെ അവസാന പ്രദര്‍ശനം നടക്കും.