ദോഹ: നവംബര്‍ 20-ന് ആരംഭിക്കുന്ന ഫിഫ ലോകകപ്പിനായി ഖത്തറിലെത്തുന്ന ഫുട്ബോള്‍ ആരാധകര്‍ക്കായി സംഘാടകര്‍ ഒരുക്കിവച്ചിരിക്കുന്ന വിസ്മയകരമായ കാഴ്ചകളെയും വിനോദ പരിപാടികളെയും കുറിച്ച് ഗൈഡ് പുറത്തറക്കി ഫിഫ ഇന്റര്‍നാഷണല്‍ ഫുട്ബോള്‍ അസോസിയേഷന്‍. ആരാധകര്‍ സന്ദര്‍ശിക്കേണ്ട നഗരങ്ങള്‍, പ്രധാന കേന്ദ്രങ്ങള്‍, വിവിധ സംഗീത, വിനോദ പരിപാടികള്‍, ഷോപ്പിംഗ് കേന്ദ്രങ്ങള്‍ തുടങ്ങിയ വിവരങ്ങള്‍ ഉള്‍പ്പെടുത്തിയിട്ടുള്ള ഒരു ടൂറിസ്റ്റ് ഗൈഡാണ് ഫിഫ അതിന്റെ ഔദ്യോഗിക വെബ്‌സൈറ്റില്‍ പ്രസിദ്ധീകരിച്ചത്
ഫിഫ ലോകകപ്പ് ഫുട്ബോള്‍ ആരാധകര്‍ക്കായി വിപുലമായ സൗകര്യങ്ങളാണ് ഗള്‍ഫ് രാജ്യം ഒരുക്കിയിരിക്കുന്നതെന്ന് ഫിഫ ഗൈഡില്‍ പറയുന്നു. ഭാവിയുടെ നഗരങ്ങള്‍, മരുഭൂമിയിലെ സാഹസികതകള്‍, ഷോപ്പിംഗിനുള്ള അനന്തമായ അവസരങ്ങള്‍ എന്നിവ ആസ്വദിക്കാനുള്ള മികച്ച സന്ദര്‍ഭമാണ് ആരാധകര്‍ക്ക് കൈവന്നിരിക്കുന്നത്. സന്ദര്‍ശകരായ പൊതുജനങ്ങള്‍ക്ക് വിനോദസഞ്ചാര യാത്രകള്‍, പ്രാദേശിക ജീവിതത്തിന്റെ എല്ലാ വശങ്ങളും ഉള്‍ക്കൊള്ളുന്ന പ്രകൃതി ടൂറുകള്‍ തുടങ്ങി ഓരുരുത്തരും ആഗ്രഹിക്കുന്നതെല്ലാം ഖത്തര്‍ വാഗ്ദാനം ചെയ്യുന്നുണ്ട്.
ലോകകപ്പ് വേളയില്‍ ഖത്തര്‍ ആരാധകര്‍ക്ക് പ്രധാനമായി അഞ്ച് കാര്യങ്ങള്‍ പ്രതീക്ഷിക്കാമെന്ന് ഫിഫ ഗൈഡ് വിശദീകരിക്കുന്നു. അതില്‍ ആദ്യത്തേത് ഖത്തറിന്റെ ഊഷ്മളമായ സ്വീകരണവും ആതിഥ്യമര്യാദയുമാണ്. ഖത്തര്‍ നിവാസികള്‍ ആതിഥ്യമര്യാദയ്ക്ക് പേരുകേട്ടവരും പരമ്പരാഗതമായി അതിഥികളുമായി ഭക്ഷണം പങ്കിടുന്നവരുമാണ്. അതിഥികള്‍ക്ക് അറബിക് കോഫിയും മധുരപലഹാരങ്ങളും നല്‍കുന്നത് ആതിഥ്യമര്യാദയുടെ ഒരു പ്രകടനമായി ഖത്തരികള്‍ ഇപ്പോഴും തുടരുന്ന രീതിയാണ്. ഇന്ത്യന്‍ ഉപഭൂഖണ്ഡം, ഇറാന്‍, സിറിയ, വടക്കേ ആഫ്രിക്ക എന്നിവിടങ്ങളിലെ പലഹാരങ്ങളുടെ സ്വാധീനം ഖത്തറിലെ സമ്പന്നവും അതുല്യവുമായ ഖത്തറി ഭക്ഷണവിഭവ ്ഹാളുകളില്‍ പ്രകടമാണെന്നും ഫിഫ പറയുന്നു.