അമ്പലപ്പുഴ: നട്ടെല്ലുതകര്‍ന്നു ജീവിതം പ്രതിസന്ധിയിലായ രാജേഷിന്റെ കുടുംബത്തിനു സഹായമേകാന്‍ വാടയ്ക്കലില്‍ നടത്തിയ ഭക്ഷ്യമേളയില്‍ കാരുണ്യത്തിന്റെ പ്രവാഹം. സാന്ത്വനം കൂട്ടായ്മയൊരുക്കിയ മേളയില്‍ നൂറുകണക്കിനാളുകളാണ് പങ്കാളികളായത്. മേളയ്‌ക്കെത്തിയ എച്ച്. സലാം എം.എല്‍.എ പാചകപ്പുരയില്‍ പൊറോട്ടയടിച്ച് സാന്ത്വനം പ്രവര്‍ത്തകര്‍ക്ക് ആവേശം പകര്‍ന്നു. ചേന്നങ്കരി വാണിയപുരയ്ക്കല്‍ രാജേഷും(37) കുടുംബവും വാടയ്ക്കലില്‍ വാടകയ്ക്കാണു താമസം. നിര്‍മാണത്തൊഴിലാളിയായ ഇദ്ദേഹത്തിന് മൂന്നുകൊല്ലംമുന്‍പ് കെട്ടിടത്തില്‍നിന്നുവീണ് നട്ടെല്ലിനു ഗുരുതര പരിക്കേറ്റിരുന്നു.
മൂന്നുവര്‍ഷത്തോളമായി കിടക്കയിലായ രാജേഷിന്റെ വീടിന്റെ നിര്‍മാണം പൂര്‍ത്തിയാക്കാനാണ് കളര്‍കോട് ഗുരുമന്ദിരം വാര്‍ഡിലെ ഒരുപറ്റം യുവജനങ്ങളുടെ കൂട്ടായ്മയായ സാന്ത്വനം ഭക്ഷ്യമേളയൊരുക്കിയത്. കൗണ്‍സിലര്‍ രമ്യാ സുര്‍ജിത്ത് രക്ഷാധികാരിയും ജെ. രാമചന്ദ്രന്‍, കെ. സിനു, ആര്‍. രാജേഷ്, ജാസ്മിന്‍ മാര്‍ട്ടിന്‍, സി.ജെ. യേശുദാസ് എന്നിവര്‍ നേതൃത്വം നല്‍കുന്ന കൂട്ടായ്മ വാടയ്ക്കല്‍ ഗുരുമന്ദിരം ജങ്ഷനുസമീപമാണ് ഭക്ഷ്യമേള നടത്തിയത്. ഞായറാഴ്ച രാവിലെയാരംഭിച്ച മേള രാത്രിവരെ നീണ്ടു. ചപ്പാത്തി, പൊറോട്ട, നെയ്‌ച്ചോര്‍, ചിക്കന്‍, ബീഫ്, വെജിറ്റബിള്‍ കറികള്‍ എന്നിവ മേളയിലുണ്ടായിരുന്നു. മുന്‍മന്ത്രി ജി. സുധാകരന്‍, നഗരസഭാധ്യക്ഷ സൗമ്യാരാജ് തുടങ്ങിയവരും മേളയ്‌ക്കെത്തി.
Discussion about this post