തിരുവനന്തപുരം: കേരളപ്പിറവി ദിനത്തോടുബന്ധിച്ച് സംസ്ഥാനത്തൊട്ടാകെ ലഹരി വിരുദ്ധ ചങ്ങല തീര്‍ത്ത് വിദ്യാര്‍ത്ഥികള്‍. കേരളത്തിലെ വിവിധ സ്ഥലങ്ങളില്‍ ജനങ്ങള്‍ പലവിധത്തില്‍ ക്യാംപെയിനിന്റെ ഭാഗമായി. വിദ്യാര്‍ത്ഥികള്‍, പൗരപ്രമുഖര്‍, കായികതാരങ്ങള്‍ ഉള്‍പ്പെടെയുള്ളവര്‍ അണി ചേര്‍ന്നു. സംസ്ഥാനത്തെ എല്ലാ ജില്ലകളിലും സ്‌കൂളുകളിലും പ്രധാന കേന്ദ്രങ്ങളിലും ഇത്തരത്തില്‍ മനുഷ്യചങ്ങല തീര്‍ത്തു. ലഹരിവസ്തുക്കള്‍ കത്തിച്ചു കൊണ്ട് സേ നോ ടു ഡ്രഗ്‌സ് എന്ന് പ്രഖ്യാപിച്ചു.
മുഖ്യമന്ത്രിയുള്‍പ്പെടെയുള്ള മന്ത്രിമാര്‍ ലഹരിവിരുദ്ധ മുദ്രാവാക്യം ചൊല്ലി. ലഹരിവിരുദ്ധ പ്രചാരണത്തിന്റെ ഒന്നാം ഘട്ടമാണ് അവസാനിക്കുന്നത്. ലഹരി മാഫിയ വിദ്യാര്‍ത്ഥികളെ പ്രത്യേകമായി ലക്ഷ്യം വെക്കുന്നുണ്ട്. എന്നാല്‍ അതിന് കീഴ്‌പ്പെടില്ലെന്ന് വിദ്യാര്‍ത്ഥികളുടെ ക്യാമ്പയിനോടുള്ള സമീപനത്തോടെ വ്യക്തമായി. കുറ്റം ചെയ്യുന്നവര്‍ക്കെതിരെ കൃത്യമായ കര്‍ക്കശമായ നടപടിയെടുക്കാന്‍ എക്‌സൈസിനും പൊലീസിനും കഴിഞ്ഞിട്ടുണ്ട്. ലഹരിക്കെതിരായ പോരാട്ടം ഈ ദിനത്തോടെ അവസാനിക്കില്ല. നാം പുതിയ ഘട്ടത്തിലേക്ക് കടക്കുകയാണ് ഇന്ന് തീര്‍ത്ത ചങ്ങലയുടെ കണ്ണി ജീവിതത്തില്‍ ഉടനീളം പൊട്ടില്ല എന്ന ഉറപ്പാക്കണം. രണ്ടാം ഘട്ട പ്രചാരണ പരിപാടി നവംബര്‍ 14 മുതല്‍ 26 വരെയാണ്.