തിരുവനന്തപുരം: ഗവര്‍ണര്‍ ആരിഫ് മുഹമ്മദ് ഖാനെ ഒരിക്കലും അംഗീകരിക്കാനാകില്ലെന്ന് കെ മുരളീധരന്‍ എംപി. ഇതോടെ വി.സി നിയമന വിഷയത്തില്‍ യുഡിഎഫിലും കോണ്‍ഗ്രസിലും ഭിന്നത തുടരുകയാണ്. ദേശീയ നയം സുധാകരനും സതീശനും അറിയില്ലേ എന്നത് അവരോട് ചോദിക്കണമെന്നും പാര്‍ട്ടിക്ക് ഉള്ളില്‍ ഇതേക്കുറിച്ച് ചര്‍ച്ചയ്ക്ക് സമയം കിട്ടിയിട്ടില്ലെന്നും മുരളീധരന്‍ പറഞ്ഞു.
നിലവിലുള്ള വി.സിമാരെ പുറത്താക്കി പകരം പുതിയ ആള്‍ക്കാരെ നിയമിക്കുന്നതില്‍ യോജിപ്പില്ലെന്നും അദ്ദേഹം പറഞ്ഞു. ഗവര്‍ണര്‍മാരെ പ്രോത്സാഹിപ്പിക്കുന്ന സമീപനം യുഡിഎഫിന് ഇല്ല. ഗവര്‍ണര്‍മാരിലൂടെ കാവിവത്കരണം നടത്താന്‍ ശ്രമം നടക്കുന്നു. ഗവര്‍ണറെ വെച്ച് കളിക്കുന്ന ഒരു കളിയോടും യോജിക്കില്ല. എല്ലാ വിസിമാരേയും നിയമിച്ചത് ഈ ഗവര്‍ണര്‍ തന്നെയാണ്. അന്ന് എന്തിന് ഇത് അംഗീകരിച്ചുവെന്നും കെ മുരളീധരന്‍ ചോദിച്ചു.
വിസിമാരുടെ രാജി ആവശ്യപ്പെട്ടത് എന്ത് അടിസ്ഥാനത്തിലാണ്. എന്തുകൊണ്ട് ആദ്യം വിശദീകരണം തേടിയില്ല. ഗവര്‍ണര്‍ രാജാവ് ആണോ? ഈ ഗവര്‍ണറെ അംഗീകരിക്കില്ല. പാര്‍ട്ടിക്ക് ഇന്ത്യയില്‍ ഒരു നയമെ ഉള്ളൂ. ചെപ്പിടവിദ്യയും പിപ്പിടിവിദ്യയും മാറ്റി പ്രശ്‌നം പരിഹരിക്കണം. ഇരുകൂട്ടരും തെറ്റ് ചെയ്തു. സുപ്രീം കോടതി വിധിയുടെ മറവില്‍ എല്ലാ വി.സിമാര്‍ക്കുമെതിരെ നടപടി എടുത്തുവെന്നും മുരളീധരന്‍ വ്യക്തമാക്കി.