മെഗാസ്റ്റാര്‍ അമിതാഭ് ബച്ചന്റെ ഇടത്തെ കാലിനു പരിക്കേറ്റു. ബച്ചന്‍ തന്നെയാണ് തന്റെ ബ്‌ളോഗിലൂടെ പരിക്കിന്റെ കാര്യം ആരാധകരുമായി പങ്കുവച്ചത്. ടെലിവിഷൻ ഷോയായ കോൻ ബനേഗാ ക്രോർപതിയുടെ സെറ്റിൽ വച്ചാണ് ബിഗ് ബിയ്ക് പരിക്കേറ്റത്.
ഇടത് കാലിൽ ഒരു ലോഹക്കഷണം കൊണ്ട് ഞരമ്പ് മുറിഞ്ഞ് ധാരാളം രക്തം പോയി. അപ്പോള്‍ തന്നെ ആശുപത്രിയില്‍ എത്തി ചികിത്സ തേടിയെന്നും താരത്തിന് ഡോക്ടർമാർ വിശ്രമം നിർദ്ദേശിച്ചുവെന്നും ബച്ചന്‍ പറഞ്ഞു.
തുന്നലുകൾ ഇടേണ്ടിവന്നതിനാൽ കാലിൽ അധികം സമ്മർദ്ദം ചെലുത്തരുതെന്ന് ഡോക്ടർമാർ അദ്ദേഹത്തോട് നിർദ്ദേശിച്ചിട്ടുണ്ട്. ട്രെഡ്മില്ലിൽ പോലും നടക്കരുതെന്നാണ് നിർദ്ദേശം.
കാലില്‍ പരിക്കേറ്റു നില്‍ക്കുന്ന ബച്ചന്റെ ചിത്രങ്ങള്‍ സോഷ്യല്‍ മീഡിയയില്‍ നിറഞ്ഞിരുന്നു. കോന്‍ ബനേഗാ ക്രോര്‍പതിയുടെ ചിത്രീകരണത്തിനിടയില്‍ പകര്‍ത്തിയ ചിത്രങ്ങള്‍ ബച്ചന്‍ തന്നെയാണ് പങ്കുവച്ചത്.
സൂരജ് ബര്‍ചാത്യയുടെ സംവിധാനത്തില്‍ ഒരുങ്ങുന്ന ‘ഉന്‍ചയ്’ ആണ് ബച്ചന്റെ പുതിയ ചിത്രം.നവംബര്‍ 11 നു തീയറ്ററുകളിലെത്തുന്ന ചിത്രത്തില്‍ അനുപം ഖേര്‍, നീന ഗുപ്ത, പരിനിതി ചോപ്ര എന്നിവരാണ് മറ്റു പ്രധാന വേഷങ്ങളിലെത്തുന്നത്.