കോഴിക്കോട്: താമരശ്ശേരിയില്‍ വ്യാപാരിയെ തട്ടിക്കൊണ്ട് പോയി. തച്ചംപൊയില്‍ ആവേലം മുരിങ്ങംപുറായില്‍ അഷ്‌റഫിനെയാണ് കാറുകളിലെത്തിയ സംഘം തട്ടിക്കൊണ്ട് പോയത്. ഇന്നലെ രാത്രിയായിരുന്നു സംഭവം. സാമ്പത്തിക തര്‍ക്കങ്ങളാണ് തട്ടിക്കൊണ്ടു പോകലിന് പിന്നിലെന്നാണ് സൂചന.
മുക്കത്ത് സൂപ്പര്‍ മാര്‍ക്കറ്റ് നടത്തുന്നയാളാണ് അഷ്‌റഫ്. കഴിഞ്ഞ ദിവസം രാത്രി സൂപ്പര്‍ മാര്‍ക്കറ്റില്‍ നിന്ന് വീട്ടിലേക്ക് മടങ്ങും വഴിയാണ് സംഭവം. വെഴുപ്പൂരില്‍ വച്ച് പിന്നാലെയെത്തിയ കാര്‍ അഷ്‌റഫ് സഞ്ചരിച്ച സ്‌കൂട്ടറിന് കുറുകെ നിറുത്തുകയും ഡ്രൈവര്‍ ഉള്‍പ്പടെ നാലുപേര്‍ പുറത്തിറങ്ങി അഷ്‌റഫിനെ ബലമായി പിടികൂടി കാറില്‍ കയറ്റുകയുമായിരുന്നു. സംഘത്തിലെ ഒരാള്‍ സ്‌കൂട്ടര്‍ റോഡരികിലേക്ക് മാറ്റി നിറുത്തിയ ശേഷം പുറകില്‍ വന്ന കാറില്‍ കയറി രക്ഷപ്പെടുകയായിരുന്നു. മുക്കം ഭാഗത്തേക്കാണ് സംഘം പോയത്.
ഇവരെക്കുറിച്ചുള്ള സൂചനകള്‍ പൊലീസിന് ലഭിച്ചിട്ടുണ്ട്. പ്രവാസിയായിരുന്ന അഷ്‌റഫിന് അവിടെ വച്ച് ചില സാമ്പത്തിക ഇടപാട് തര്‍ക്കങ്ങളുണ്ടായിരുന്നു. ഇതാണ് തട്ടിക്കൊണ്ടു പോകലിന് കാരണമെന്നാണ് പൊലീസ് നിഗമനം. താമരശേരി പൊലീസാണ് കേസ് അന്വേഷിക്കുന്നത്.
Discussion about this post