തിരുവനന്തപുരം: വി സി നിയമനം റദ്ദാക്കിയ കോടതി വിധിക്ക് പിന്നാലെ പുനപരിശോധന സാധ്യത തേടി കേരളം. യുജിസിയും ചാന്‍സലറും നിയമനം അംഗീകരിച്ചതാണെന്നാണ് കേരളത്തിന്റെ വാദം. യുജിസി ചട്ടങ്ങള്‍ ലംഘിച്ചിട്ടില്ലെന്നുള്ള നിലപാടിലും സംസ്ഥാനം ഉറച്ചുനില്‍ക്കുകയാണ് .
ഡോ.എം എസ് രാജശ്രീയുടെ നിയമനമാണ് സുപ്രിംകോടതി റദ്ദാക്കിയത്. ചട്ടപ്രകാരമല്ല നിയമനം നടത്തിയത് എന്ന ഹര്‍ജിയിലായിരുന്നു കോടതി ഉത്തരവ്. 2013ലെ യുജിസി ചട്ടങ്ങള്‍ ലംഘിച്ചുകൊണ്ടാണ് വി സി നിയമനം നടന്നതെന്നും സുപ്രിംകോടതി ചൂണ്ടിക്കാട്ടി. വി സി നിയമനത്തില്‍ ചാന്‍സലര്‍ക്ക് പാനല്‍ കൈമാറുന്നതിന് പകരം ഒരു വ്യക്തിയുടെ പേര് കൈമാറുക മാത്രമാണ് ചെയ്തതെന്ന് സുപ്രിംകോടതി നിരീക്ഷിച്ചു. സാങ്കേതിക സര്‍വകലാശാല മുന്‍ ഡീന്‍ ശ്രീജിത് പി എസ് ആണ് വൈസ് ചാന്‍സലര്‍ നിയമനം ചോദ്യം ചെയ്ത് കോടതിയെ സമീപിച്ചത്.
യുജിസി ചട്ടങ്ങള്‍ പ്രകാരം സംസ്ഥാന നിയമത്തിന്റെ അടിസ്ഥാനത്തില്‍ നിയമനം നടത്താന്‍ അധികാരമുണ്ടെന്ന വാദം തള്ളിയാണ് കോടതി വിധിപറഞ്ഞത്.