ന്യൂഡല്‍ഹി: ഇന്ത്യയുടെ ദക്ഷിണേഷ്യന്‍ രാജ്യങ്ങളിലേക്കുള്ള കയറ്റുമതിയില്‍ ഇടിവ്. നേപ്പാളും ബംഗ്ലാദേശും വിദേശനാണ്യ പ്രതിസന്ധിയുടെ പശ്ചാത്തലത്തില്‍ ഇറക്കുമതിക്ക് ഏര്‍പ്പെടുത്തിയ നിയന്ത്രണങ്ങളാണ് ഇന്ത്യയ്ക്ക് തിരിച്ചടിയായത്. ബംഗ്ലാദേശ്, നേപ്പാള്‍, ശ്രീലങ്ക, ഭൂട്ടാന്‍, മാലിദ്വീപ് എന്നീ രാജ്യങ്ങളുടെ പ്രധാന വ്യാപാര പങ്കാളിയാണ് ഇന്ത്യ. ദക്ഷിണേഷ്യന്‍ രാജ്യങ്ങളിലേക്കുള്ള കയറ്റുമതിയില്‍ 10.5 ശതമാനം കുറവാണ് 2022 ഓഗസ്റ്റില്‍ ഉണ്ടായിരിക്കുന്നത്.
2.1 ബില്യണ്‍ ഡോളറിന്റെ സാധനങ്ങളാണ് ഓഗസ്റ്റില്‍ ഇന്ത്യ ദക്ഷിണേഷ്യന്‍ രാജ്യങ്ങളിലേക്ക് കയറ്റി അയച്ചിരുന്നത്. ബംഗ്ലാദേശിലേക്കുള്ള കയറ്റുമതി 22.7 ശതമാനം ഇടിഞ്ഞ് 889 ദശലക്ഷം ഡോളറിലെത്തി. എന്നിരുന്നാലും, നടപ്പ് സാമ്പത്തിക വര്‍ഷത്തിലെ ആദ്യ അഞ്ച് മാസങ്ങളില്‍ (ഏപ്രില്‍-ഓഗസ്റ്റ്) കയറ്റുമതി 8.7 ശതമാനം വര്‍ദ്ധിച്ചു. ഓഗസ്റ്റില്‍ നേപ്പാളിലേക്കുള്ള കയറ്റുമതിയില്‍ 11.3 ശതമാനം ഇടിവുണ്ടായി. ഏപ്രില്‍-ഓഗസ്റ്റ് കാലയളവില്‍ കയറ്റുമതിയില്‍ മൂന്ന് ശതമാനം വളര്‍ച്ചയുണ്ടായി.
അതേസമയം, ഓഗസ്റ്റില്‍ ശ്രീലങ്കയിലേക്കും പാകിസ്ഥാനിലേക്കുമുള്ള ഇന്ത്യയുടെ കയറ്റുമതി വര്‍ദ്ധിച്ചു. ശ്രീലങ്കയിലേക്കുള്ള കയറ്റുമതി 15.7 ശതമാനം ഉയര്‍ന്ന് 356 ദശലക്ഷം ഡോളറിലെത്തി. സാമ്പത്തിക പ്രതിസന്ധിയുടെ പശ്ചാത്തലത്തില്‍ ശ്രീലങ്കയ്ക്ക് ഇന്ത്യ നല്‍കിയ സഹായം കയറ്റുമതി വര്‍ദ്ധനവിന് കാരണമായി. ഇതുവരെ 4 ബില്യണ്‍ ഡോളറിന്റെ സഹായം ശ്രീലങ്കയ്ക്ക് ഇന്ത്യ നല്‍കിയിട്ടുണ്ട്.
ഇന്ത്യയുടെ മൊത്തം ചരക്ക് കയറ്റുമതി ഓഗസ്റ്റില്‍ 10.6 ശതമാനം ഉയര്‍ന്ന് 36.9 ബില്യണ്‍ ഡോളറിലെത്തി. ഏപ്രില്‍-ഓഗസ്റ്റ് കാലയളവില്‍ ഇന്ത്യയുടെ കയറ്റുമതി 196.4 ബില്യണ്‍ ഡോളറായിരുന്നു. കയറ്റുമതി മുന്‍വര്‍ഷത്തെ അപേക്ഷിച്ച് 19.5 ശതമാനം വര്‍ദ്ധിച്ചു.
Discussion about this post