തിരുവനന്തപുരം: വിജയദശമി നാളായ ഇന്ന് ആദ്യാക്ഷരം കുറിച്ച് കുരുന്നുകള്‍ അറിവിന്റെ ലോകത്തേയ്ക്ക് കടക്കുന്നു. നവരാത്രിയുടെ അവസാന ദിനമായ വിജയദശമിയില്‍ ആദ്യക്ഷരം കുറിക്കാനായി ആയിരക്കണക്കിന് കുഞ്ഞുങ്ങളാണ് ക്ഷേത്രങ്ങളില്‍ എത്തിയിരിക്കുന്നത്. ക്ഷേത്രങ്ങള്‍, സാംസ്‌കാരിക കേന്ദ്രങ്ങള്‍, ഗ്രന്ഥശാലകള്‍ എന്നിവിടങ്ങളിലും പ്രത്യേകം സജ്ജീകരിച്ച സ്ഥലങ്ങളിലുമാണ് വിദ്യാരംഭചടങ്ങുകള്‍ നടക്കുന്നത്. എഴുത്തുകാര്‍ക്കും സാംസ്‌കാരിക നായകരുമടക്കം നിരവധി പ്രമുഖരാണ് കുഞ്ഞുങ്ങളെ ആദ്യാക്ഷരം കുറിപ്പിക്കാനായി എത്തിയത്. തിരുവനന്തപുരം പൂജപ്പുര സരസ്വതി ക്ഷേത്രത്തില്‍ നടന്ന വിദ്യാരംഭ ചടങ്ങില്‍ കേരള ഗവര്‍ണര്‍ ആരിഫ് മുഹമ്മദ് ഖാനും പങ്കാളിയായി.
നവാത്രിയുമായി ബന്ധപ്പെട്ട് നിരവധി ഐതിഹ്യങ്ങളാണ് നിലവിലുള്ളത്. അസുരരാജാവായ മഹിഷാസുരനെ നിഗ്രഹിച്ച് വിജയം വരിച്ച കാലമാണ് വിജയദശമി എന്നാണ് ഒരു വിശ്വാസം. രാവണനിഗ്രഹത്തിന് ശ്രീരാമന്‍ ഒന്‍പത് ദിവസം ദേവിയെ ഉപാസിച്ചു എന്നാണ് മറ്റൊരു ഐതിഹ്യം. ക്ഷേത്രങ്ങളില്‍ അതിരാവിലെ സരസ്വതീപൂജക്ക് ശേഷം കുഞ്ഞുങ്ങള്‍ അരിയില്‍ ആദ്യാക്ഷരം കുറിച്ചുതുടങ്ങി.
കോവിഡ് വ്യാപനത്തിന് ശേഷം ആദ്യമായായാണ് വിപുലമായ വിദ്യാരംഭ ചടങ്ങുകള്‍ നടക്കുന്നത്. കൊല്ലൂര്‍ മൂകാംബിക ക്ഷേത്രം, തുഞ്ചന്‍പറമ്പ്, കൊല്ലൂര്‍ മൂകാംബിക, പനച്ചിക്കാട് ക്ഷേത്രം, പൂജപ്പുര, ചോറ്റാനിക്കര എന്നിവിടങ്ങളില്‍ ആദ്യാക്ഷകരം കുറിക്കാന്‍ കുരുന്നുകളുടെ തിരക്കാണ്.
Discussion about this post